العالمي في الاستاد

المايسترو الرياضي21 يونيو، 2022

الكورة للجماهير والمدرج هو بيتنا

غبت عنه سنين كتير ورجوعى كان كله حماس

وقلت ارجع بيتنا من تاني

راجع من السفر مشتاق للمدرج بعد سنين الكورونا وقبلها انقطاع الجماهير، وداخل وفى دماغى صورة للمدرج بتاع زمان

خلصت ال fan id قبل ما اجي وحجزت التذكرة من المكان اللي المفروض استلم منه ولما رحت قالولى مفيش ولما قلت ازاى ده المكان المعلن ولما سألت فين قالولى كلم تذكرتى وبعد يومين اتصالات واستهزاء من الى رد ع التليفون وخناق وتعلية صوت الحمدلله استلمت التذكرة

وفرحت اني رايح الاستاد وكلمت كل اصحابى بتوع زمان بس محدش كان عاوز يروح الاستاد واخدت جو ورحنا الاستاد واتجهنا ع الاستاد لقيت واحد بيفتشنى قلت عادى حط ايده فى اماكن غريبة زقيت ايده قلتله فى ايه يا عمنا قالى فى ناس بتخبى الولاعات فى اماكن غريبة .

فضل يغلس عليا لما لقى معايا علبة سجاير وفضل يفتش ع الولاعة مش بس كده ده لقى معايا ازازة مية راح فتح الغطا ورماه فقلتله ليه كده ده احنا حتى فى رمضان عاوز اشرب واغطى الازازة لتتلوث بصلى بقرف ومردش عليا وخلص.

مشيت 10 خطوات لقيت واحد تانى بيعمل نفس الى عمله الاولانى رحت قايله تانى؟ بصلى باستغراب وكمل تفتيش فضل يفتش يفتش يفتش ملقاش حاجه قالى خش.

بعد 10 خطوات كمان قابلت واحد كمان بتاع التذاكر عمل سكان وقالى اتفضل وابتسم وده الوحيد الى ابتسم و10 خطوات تانيين وبدأ نفس التفتيش اللعين قلتله هو فى ايه؟ هو فى ايه؟ هو فى ايه؟ قالى تعليمات يا بيه

وفضل يفتش زى الى قبله وبعدها قالى اتفضل

دخلت وفضلت ماشى ماشى ماشى وفى الآخر وصلت للناس الى بتقطع التذكرة ودخلت الملعب وجسمى قشعر م الفرحة ووقفت اصور الملعب كام صورة ع كام فيديو وقلت اروح اقعد هناك جنب السور واتمشيت ولما جيت اقعد قالي ممنوع قلتله ممنوع ليه قالى ممنوع لحسن حد يرمى قنبلة .

فقلت خلاص اقرب واقعد تحت فقالى برضه تحت ممنوع فقلت بقه مبدهاش اطلع اقعد فوق جالى جرى وقالى هنا كمان ممنوع فقلتله اقعد فين قالى اقعد زى الناس ما هى قاعدة فسألته ليه قالى دى تعليمات البيه

ورحنا قعدنا مكان ما شاور اللعيبة نزلت سخنت وحييناهم وبدأت المباراة ببص ملقيتش جمهور على يمينى شوية بيتنططوا ويغنوا خدت الكاميرا ورحت اطلب منهم اغنية قالى ثوانى واتاريه واخد تعليمات من البيه.

ورجعت اكمل الماتش اكنى قاعد فى البيت وخلص الماتش وضلم الاستاد وجه نفس الراجل بتاع ممنوع قالى شطبنا شطبنا

حاجات غريبة شفتها فى أكتر من مباراة وكل ده بيفتح تساؤل…. هو ليه فى خوف من الجمهور؟

بس مش غريبة ان وسط الروتين والملل الى بنعيشه فى الوسط الرياضى والممنوع والغير ممنوع الكل بيعمل دوره زى الموظف مفيش روح…. مفيش لون ولا طعم ولا ريحة.

حتى الحضور الى فى المدرج زى الموظف بيروح وخلاص تقضية واجب وبس، من غير إحساس بيهتفوا وخلاص.

تجربة وعدت بس كأنها عالم موازى مش هى دى المدرجات الى ياما عشت فيها لحظات أكتب عنها روايات وهزعل ليه ما هى دى الكورة برضه مش زى كورة زمان

ويلا على الرياضة السلام